Ian Wright segir að ákveðnir hlutar breskra fjölmiðla séu einfaldlega ekki tilbúnir fyrir stórstjörnu sem er dökk á hörund, í tengslum við gagnrýni á Jude Bellingham undanfarið.

Bellingham hefur verið gagnrýndur eftir að hafa sýnt ósætti sitt er honum var skipt af velli í 2-0 sigri Englands gegn Albaníu, en hann fór af velli á 83. mínútu þrátt fyrir að hafa verið valinn maður leiksins. Hefur verið fjallað um meint ósætti hans og landsliðsþjálfarans Thomas Tuchel.

Wright ræddi málið í The Overlap ásamt Gary Neville, Jamie Carragher, Roy Keane og Wayne Rooney. Hann sagði að stórir leikmenn eins og Bellingham muni aldrei vera ánægðir með að fara af velli, en þeir verða að taka því. Sagði hann einnig að gagnrýnin gæti verið lituð af fordómum.

„Ég hef áhyggjur af Jude vegna þess að hann er einhver sem fjölmiðlarnir geta ekki stjórnað. Hann er að sýna fólki: Ég er hérna, ég er svartur, ég er stoltur, ég er tilbúinn,“ sagði Wright.

Gary Neville rifjaði upp samtal við Raheem Sterling árið 2016 þar sem Sterling lýsti því að hann væri óeðlilega mikið tekinn fyrir, ekki vegna fótboltans heldur kynþáttar. Wright hélt svo áfram.

„Sumir í breskum fjölmiðlum eru ekki tilbúnir fyrir svarta stórstjörnu. Hver getur hreyft sig eins og Jude? Þeir ná honum ekki. Menn eins og Jude hræða ákveðna aðila vegna þess hvað hann getur og hvaða áhrif hann getur haft á aðra. Sem svartur maður lærirðu að þú vilt bara gera þitt besta og halda höfðinu niðri, en Jude er með kassann úti og það vekur viðbrögð.“