Viktor Gyökeres þarf að bæta líkamlegt ástand sitt til að ná fullum árangri hjá Arsenal, að mati fyrrverandi leikmanns félagsins, Stefan Schwarz.

Hann telur að vaxtarlag og of mörg kíló sænska framherjans geti verið að halda aftur af honum miðað við markauppskeru hans hjá Sporting Lissabon.

Ummælin falla líklega ekki í kramið hjá Gyökeres, sem hefur áður svarað gagnrýni um að hann væri of þungur þegar hann var í Portúgal og sýndi það í verki að hún ætti ekki við.

Gyökeres hefur þó byrjað ágætlega hjá Arsenal, skorað sex mörk í 14 leikjum og hlotið lof frá Mikel Arteta fyrir ótrúlega vinnusemi. Hann hefur byrjað flesta leiki tímabilsins.

Schwarz, sem sjálfur lék aðeins eitt tímabil hjá Arsenal, segir Gyökeres hafa hæfileika til að blómstra en þurfi tíma: „Hann þarf að koma sér í betra form. Hann er í frábæru liði með Arteta og toppleikmenn í kringum sig.“

Hann bætir við að samkeppnin sé gríðarleg og Gyökeres muni ekki spila alla leiki. „Hann er sterkur, líkamlega öflugur og klárar vel með báðum fótum, en hann þarf að léttast aðeins og finna taktinn.“

Schwarz telur að með meiri leikreynslu muni Gyökeres skora mörg mörk og styrkja Arsenal í titilbaráttunni.