Thomas Tuchel segir að hann íhugi að ferðast til Spánar til að ræða við Trent Alexander-Arnold um stöðu hans í enska landsliðinu. Hægri bakvörðurinn hefur ekki spilað landsleik síðan hann kom inn á í 26 mínútur í 1-0 sigri gegn Andorra í júní á síðasta ári, það er jafnframt hans eini leikur undir stjórn Tuchel.

Aðeins tveir vináttuleikir í mars eru eftir áður en England fer á HM í Bandaríkjunum næsta sumar og Tuchel vill nú hitta 27 ára leikmanninn og ræða framtíð hans. „Starfið mitt er að hafa samband við alla, leikmenn eins og Trent,“ sagði hann eftir sigurinn á Albaníu.

„Útskýra af hverju þeir voru ekki valdir, hvað þeir þurfa að bæta og hvort eitthvað sé í þeirra höndum.“

Alexander-Arnold er líklega þekktasti leikmaðurinn sem stendur utan hópsins um þessar mundir. Aðspurður hvort hann myndi heimsækja hann sagði Tuchel: „Af hverju ekki? Við gætum jafnvel hitt Jude Bellingham og Trent saman. Ég hata símtöl, FaceTime er betra, eða heimsóknir á æfingar.“

Reece James er áfram fyrsti kostur Tuchels í stöðunni, þegar hann er heill. Í Tirana fékk Jarell Quansah, fyrrum samherji Alexander-Arnold hjá Liverpool, tækifærið. „Ég hef mikla trú á Jarell. Hann er hraður, sterkur og frábær í uppbyggingu leiks,“ sagði Tuchel og bætti við að Quansah væri örlítið á undan um þessar mundir.