Tómas Bent Magnússon er á leið til skoska stórliðsins Hearts frá Val. Formaður knattspyrnudeildar félagsins segir söluna afar jákvæða þó um missi sé að ræða fyrir topplið Bestu deildarinnar.

„Það er allt klárt að því gefnu að hann standist læknisskoðun og fái atvinnuleyfi. Það liggur fyrir samkomulag milli Vals og Hearts,“ sagði Björn Steinar Jónsson við 433.is í dag.

Tómas er búinn að stíga vel upp með liði Vals undanfarið og Björn telur frammistöðu hans gegn Flora Tallin í Sambandsdeildinni á dögunum hafa mikil áhrif.

„Hann er búinn að eiga mjög góða leiki undanfarið. Þetta er líka ágætis vitnisburður um það hvað hlutirnir geta gerst hratt ef menn standa sig vel, sérstaklega í þessum Evrópuleikjum. Hann átti náttúrulega frábæran leik gegn Flora Tallin í fyrsta leiknum.“

Björn samgleðst innilega með Tómasi, sem er að fara í lið sem hafnaði um miðja deild í Skotlandi í vor.

„Deildin hérna heima er feeder-deild fyrir stærri deildir. Hearts er miklu stærri klúbbur en við erum, með 20 þúsund mann völl í Edinborg. Þó þetta sé ekki á frábærum tímapunkti fyrir okkur er þetta frábært dæmi um það hvert ungir leikmenn geta farið ef þeir standa sig vel.“

En er salan góð fyrir Val fjárhagslega séð?

„Við erum mjög ánægðir með söluna á allan hátt. Við erum sáttir við það sem við fáum og njótum góðs af því ef hann tekur næstu skref. Þó tímapunkturinn sé vondur er ekkert nema jákvætt um þetta að segja.

Við fórum inn í tímabilið með stóran hóp til að takast á við það ef meiðsli eða eitthvað svona kemur upp. Við þurfum að takast á við það með þann hóp sem við erum með en erum opnir fyrir því að bæta við okkur ef réttu leikmennirnir eru í boði,“ sagði Björn enn fremur, en Valsmenn hafa til að mynda verið sterklega orðaðir við Valdimar Þór Ingimundarson hjá Víkingi.

Valur er með tveggja stiga forskot á Víking og Breiðablik á toppi Bestu deildarinnar.