Örvæntingarfull leit að morðingjanum sem myrti hjón fyrir framan ungar dætur þeirra í Devil’s Den þjóðgarðinum í Arkansas í Bandaríkjunum var hert í dag, mánudag. Á sama tíma réttlættu yfirvöld af hverju það tók sex klukkustundir að láta almenning vita að tvöfaldur morðingi væri á flótta.

Fyrsta tilkynning barst með símtali á laugardag klukkan 14:30 um að árás væri í gangi í þjóðgarðinum og fyrstu viðbragðsaðilar heyrðu síðan óp. Þegar viðbragðsaðilar komu á vettvang fundu þeir hjónin, Clinton David Brink, 43 ára, og Cristen Amanda Brink, 41 árs, látin á göngustíg í garðinum. Höfðu þau verið myrt fyrir framan dætur þeirra, sjö og níu ára, en þær fundust ómeiddar nálægt vettvangi. Fjölskyldan var nýlega flutt til Arkansas.

Lögreglan gaf ekki ítarlegar upplýsingar um hvernig parið var myrt né hvenær. Hins vegar fengu fjölmiðlar tilkynningar um mikla lögregluviðveru á svæðinu klukkan 16:30, en fjölmiðlum var sagt að yfirgefa svæðið og engar upplýsingar gefnar.

Það var ekki fyrr en klukkan 20:40 um það bil sex klukkustundum eftir fyrsta útkall að lögreglan í Arkansas (ASP) sendi frá sér fyrstu viðvörunina um að umfangsmikil leit væri i gangi.

Töfin var að sögn rakin til þess hve „landslagið er ójafnt, gróðurinn þéttur og farsímasamband er ekki til staðar.“ „Staðsetningin er í afskekktu dreifbýli í Arkansas,“ sagði talsmaður ASP við 5News. „Það tók tíma fyrir rannsakendur okkar að koma á vettvang, finna vitni, taka viðtöl og vinna upplýsingar, svo við gætum birt viðeigandi upplýsingar.“

Lögreglan gaf síðan út uppfærða lýsingu á meintum geranda á sunnudag og sagði að hann hefði síðast sést í síðermaskyrtu með upprúlluðum ermum frekar en topp eins og upphaflega var greint frá. Manninum er lýst sem manni að meðalvexti, klæddur dökkum buxum, rauðri  hafnaboltahúfu og með sólgleraugu. Lögreglan sagði að hann hefði einnig verið með bakpoka og fingurlausa hanska. Sást maðurinn aka inn í garðinn í svörtum fjögurra dyra fólksbíl, hugsanlega Mözdu, með skráningarnúmerið hulið með límbandi.

Í yfirlýsingu frá þjóðgarðinum kom fram að lögreglueftirlit hefði verið aukið til að tryggja öryggi gesta.

Devil’s Den þjóðgarðurinn, sem er staðsettur í Ozark-skóginum, er ferðamannastaður sem er frægur fyrir hella sína, klettamyndanir og þúsundir hektara af skógi.