Að minnsta kosti fimm lík hafa fundist í sjónum við strendur hinnar vinsælu ferðamannaeyjar Mallorca síðastliðnar vikur. Það sem gerir málið sérstaklega óhugnanlegt er að líkin voru hlekkjuð á höndum og fótum.

Grunur leikur á að um sé að ræða flóttamenn frá Alsír sem hugðust fara til Spánar í leit að betra lífi. En það er lögreglu hulin ráðgáta hvers vegna búið var að hlekkja fólkið, en helst beinist grunur að því að fólkið hafi verið myrt á leiðinni yfir Miðjarðarhafið og líkunum svo varpað í sjóinn.

Í fréttum spænskra fjölmiðla kemur fram að líkin hafi fundist í maí en það var nýlega að spænska lögreglan sendi frá sér tilkynningu um málið. Rannsókn málsins er sögð flókin enda erfitt að rekja slóð þeirra flóttamanna sem komast inn á meginlandið.

Eitt líkið mun hafa fundist við vestur af Formentera þann 18. maí síðastliðinn og voru það ferðamenn á snekkju sem sigldi undir belgískum fána sem komu auga á líkið í sjónum. Viðkomandi var í björgunarvesti en var sem fyrr segir hlekkjaður á höndum og fótum.

Nokkrum dögum síðar fannst annað lík skammt frá og sömu sögu var að segja af því. Alls hafa fimm lík fundist síðustu vikurnar og bendir allt til þess að um hafi verið að ræða flóttamenn.