Það er nokkuð ljóst að dramatíkin í kringum hugsanleg félagaskipti Viktor Gyokeres frá Sporting mun dragast eitthvað fram á sumarið, en nú hefur hann hafnað tilboði frá Ítalíu ef marka má miðla þar í landi.

Framherjinn eftirsótti fékk veglegt tilboð frá Juventus með boði um vikulaun upp á meira en 200 þúsund pund en kvaðst ekki hafa neinn áhuga á að spila í Serie A á þessum tímapunkti samkvæmt fréttunum.

Gyokeres vill fara í ensku úrvalsdeildina og er talið líklegast að hann fari til Arsenal. Talksport segir leikmanninn hafa tekið ákvörðun um að semja við Lundúnaliðið, frekar en til dæmis Manchester United sem einnig hefur áhuga.

Það virðist þó ekki ætla að verða auðvelt að landa Gyokeres í sumar. Leikmaðurinn er brjálaður út í félag sitt þar sem hann taldi sig mega fara fyrir um 60 milljónir punda í sumar. Sporting vill þó fá nær 80 milljónum punda.

Arsenal er í dauðaleit að framherja eftir vandræði með þá stöðu undanfarin tímabil. Benjamin Sesko hjá RB Leipzig hefur einnig verið nokkuð sterklega orðaður við félagið.