Fyrrverandi lögreglumennirnir Jón Óttar Ólafsson og Guðmundur Haukur Gunnarsson, eigendur spæjarastofunnar PPP sf., höfðu í fórum sínum margfalt meira magn viðkvæmra upplýsinga en áður hefur verið greint frá. Um er að ræða gögn sem þeir Jón og Óttar höfðu ekki heimild til að hafa í vörslum sínum og áttu að hafa skilað eða eytt. Þetta kom fram í ítarlegri umfjöllun Kastljóss í gærkvöldi.
Gögnin sem PPP komst yfir á árunum eftir hrun eru margvísleg og viðkvæm. Þeirra á meðal eru símtalsupptökur úr rannsóknum sérstaks saksóknara, tölvupóstar starfsmanna fjármálafyrirtækja og einkagögn einstaklinga. Í heildina má finna í gögnunum á þriðju milljón tölvupósta.
Kastljós fjallar sérstaklega um að PPP hafi haft í fórum sínum eins konar „masterlykil“ að kerfum Glitnis banka. Þannig hafði PPP skrá yfir lykilorð starfsmanna og aðgang að upplýsingum um flest allt sem finna má í einum banka. Kastljós segir að meðal gagna séu upplýsingar sem eru svo viðkvæmar að allt að tveggja ára fangelsi kann að bíða þeirra sem ekki virða trúnað um þær.
Eins hafði PPP í fórum sínum tölvupósta starfsmanna, móttekna, senda og jafnvel tölvupósta sem hafði verið eytt. Eins má finna þarna afrit af fartölvum lykilstarfsmanna þar með talið tölvum Bjarna Ármannssonar og Lárusar Welding, fyrrum bankastjóra. Þar má finna viðkvæm trúnaðargögn sem varða bæði störf bankastjóranna sem og persónuleg einkagögn þeirra og fjölskyldna þeirra. Um 1500 upptökur úr borðsímum starfsmanna eru á meðal gagnanna, en um er að ræða samtöl starfsmanna hver við annan og við viðskiptavini.
Einnig er þarna að finna drif sem virðist innihalda öll vinnugögn rannsóknarteymis slitastjórnar Glitnis, þar með talið afrit af tölvu eða heimasvæði forstöðumanns teymisins þar sem finna má persónuleg gögn um hann og fjölskyldumeðlimi hans.
Annað gagnasafn varðaði eitt umsvifamesta fjárfestingafélag landsins fyrir hrun, Baug hf. PPP fékk gagnapakka um Baug frá slitastjórn Glitnis. Þar mátti finna afrit af tölvum starfsmanna Baugs og fleira. PPP fór rækilega yfir gagnasafnið og tók saman sérstaka möppu sem heitir: „Merkilegir póstar ekki tengdir málum“ en þar má finna tölvupósta stjórnenda og starfsmanna Baugs sem hafa ekkert að gera með þau mál sem slitastjórn Glitnis hafði til skoðunar.
Spæjarastofan fékk 50 milljónir greiddar frá slitastjórninni fyrir þriggja mánaða gagnagreiningu árið 2012. Jafnvel vinnugögn slitastjórnarinnar sjálfrar enduðu í fórum PPP sem geymdi gögnin áfram þó að vinnu þeirra væri lokið.
Kastljós greinir frá því að slitastjórnin hafi fengið PPP þetta verkefni út af reynslu eigendanna, Jóns Óttars og Guðmundar, sem væru hoknir af reynslu frá störfum sínum innan lögreglunnar og embættis sérstaks saksóknara. Þeir hafi átt að finna gögn í þessum stóru gagnapökkum til að varpa ljósi á viðskipti sem hefðu skaðað Glitni. Eftir að PPP hafði lokið störfum birtust fréttir um að Jón Óttar og Guðmundur hefðu verið kærðir fyrir brot gegn þagnarskyldu í störfum sínum fyrir sérstakan saksóknara. Núverandi talsmenn þrotabús Glitnis sögðu í samtali við Kastljós að þessi tíðindi hafi gert að verkum að slitastjórnin lagði sérstaka áherslu á að gögnin sem PPP hafði fengið yrðu ekki eftir í vörslum fyrirtækisins eða eigenda þess. Eins hafi utanaðkomandi sérfræðingur fylgt því eftir að gögnunum yrði eytt, en þá hafði PPP líklega þegar afritað gögnin.
Eins hafði PPP fengið gagnapakka frá VBS-fjárfestingarbanka en skiptastjóri bankans, Hróbjartur Jónatansson, sagði það hafa komið sér í opna skjöldu að PPP hefði tekið afrit af gögnunum.
