Við notum þau til að telja skref, skrá hversu lengi við sofum og til að hafa stjórn á hinum ýmsu tilkynningum sem rignir yfir okkur alla daga. Snjallúr eru orðin hluti af hinu daglega lífi og margir telja sig ekki geta komist af án þeirra. En samkvæmt því sem aðferðarfræðingurinn Serge Eliseeff segir, þá er góð ástæða til að vera ekki með þau á handleggnum allan sólarhringinn.

„Við höfum gert ósköp venjulega hluti, eins og að ganga og sofa, að mælanlegum hlutum sem okkur finnst að við þurfum sífellt að bæta. Þetta gerir að verkum að við eigum aldrei algjört frí,“ segir Serge sem er forstjóri Online Free Games og ráðgjafi varðandi stafræna hegðun.

Hann ráðleggur fólki því að taka sér meðvitaðar pásur frá snjallúrunum, ekki eingöngu vegna andlegs heilbrigðis, heldur einnig vegna líkamlegrar vellíðunar.

Hann segir að á eftirtöldum tímapunktum eigi fólk að taka snjallúrið af sér:

Á meðan borðað er (venjulega á milli 12-12 og 18-19) – Það getur virst meinlaust að vera með snjallúr á sér við matarborðið en það truflar meira en þú heldur. „Það síðasta sem þú hefur þörf fyrir, á meðan þú borðar, er úr sem titrar á fimm mínútna fresti. Taktu það af þér og vertu til staðar, bæði fyrir  matinn og félagsskapinn,“ segir Serge.

Á kvöldin (19-21) – Þegar líkaminn þarf að róast, þá eiga skjáir og gagnasafnarar að taka sér hlé. „Við eigum að hverfa frá hugsuninni um að það þurfi að mæla allt og bæta, sérstaklega þegar við reynum að slaka á,“ segir hann. Snjallúr, sem minnir þig á að þú hafir ekki hreyft þig í þetta margar mínútur eða sendir þér uppfærslur, getur verið allt annað en afslappandi.

Á meðan sofið er (22-06) – Þrátt fyrir að margir noti snjallúr til að mæla svefngæðin, þá getur það, svo undarlegt sem það nú er, dregið úr svefngæðunum. „Blátt ljós og veikar rafsegulbylgjur (EMF) geta haft áhrif á svefninn, sérstaklega hjá viðkvæmu fólki,“ segir Serge sem ráðleggur fólki að taka úrið af sér 30 mínútum áður en farið er í rúmið.

Þegar þú ert í félagsskap með öðrum – Hvort sem þú ert að borða kvöldmat, á stefnumóti eða með börnunum, þá segir hann að þú eigir að láta úrið vera í vasanum. „Skilaboðin valda smávegis andlegum truflunum og taka þig úr núinu. Félagsleg nærveru er ekki hægt að mæla en hún er miklu mikilvægari en svo,“ segir hann.

Hann bendir á að snjallúr geti verið snilldartæki þegar kemur að heilsufari, skipulagi og hreyfingu en þegar þau eru alltaf í notkun, geti þau einnig valdið óróa, stressi og ómeðvitað gert fólk háð þeim.

„Úrið á að þjóna þér, ekki öfugt.“