Tveir karlmenn eru látnir eftir eldsvoðann sem varð í kjallaraíbúð í fjölbýlishúsi á Hjarðarhaga á fimmtudagsmorgun. Allt tiltækt slökkvilið var kallað út og urðu fjölmargir íbúar miðborgar og vesturbæjar varir við útkallið. 

„Annar þeirra var frá Bandaríkjunum og á sextugsaldri og hinn var frá Tékklandi á fertugsaldri. Báðir höfðu þeir búið hér á landi í nokkur ár,“ segir Ævar Pálmi Ævarsson, aðstoðaryfirlögregluþjónn hjá lögreglunni á höfuðborgarsvæðinu í kvöldfréttum Stöðvar 2.

Þriðji maðurinn komst út um glugga og gat látið vita að fleiri menn væru í íbúðinni. Maðurinn liggur þungt haldinn á sjúkrahúsi. „Hann er mikið slasaður og mun líklegast þurfa að liggja á sjúkrahúsi í nokkra daga í viðbót.“

Mennirnir þrír leigðu herbergi í íbúðinni ásamt fjórða manninum, ungverskum manni á þrítugsaldri, sem farinn var til vinnu þegar eldsvoðinn varð. Maðurinn missti aleigu sína í eldsvoðanum og er nú húsnæðislaus. Mennirnir fjórir tengdust ekkert nema sem samleigjendur í íbúðinni.

Ævar Pálmi segir rannsókn málsins í fullum gangi, og meðal annars beinast af hvort eitthvað saknæmt hafi átt sér stað. Ævar segir ekki tímabært að tjá sig um eldsupptök. Rannsókn stendur yfir og beinist meðal annars að því hvort eitthvað saknæmt hafi átt sér stað. Skýrslur hafi verið teknar af þeim sem lentu í brunandum, sem og vitnum og íbúum í húsinu. 

Í fréttum Stöðvar 2 kom fram að slökkvilið hafi talað um að mikill eldur hafi verið í íbúðinni og samkvæmt heimildum fréttastofu hafi bensínbrúsar verið þar inni. Íbúar í húsinu hafa lýst því að hafa heyrt sprengingu áður en þeir urðu varir við eldsvoðann.

Aðspurður um hvort eitthvað bendi til fíkniefnaframleiðslu í íbúðinni svarar Ævar Pálmi: 

„Nei, það er ekkert sem bendir til þess.“