Andy Robertson er að öllum líkindum á förum frá Liverpool í sumar og er áhugi innan Englands.

Bakvörðurinn verður samningslaus í sumar og fer þá líklega frítt, en hann hefur reynst Liverpool frábær þjónn um árabil.

Nú er Skotinn hins vegar kominn í aukahlutverk, en Aston Villa, Crystal Palace og Wolves eru öll sögð skoða það að fá hann og bjóða honum stærra hlutverk.

Öll liðin spila í ensku úrvalsdeildinni en það verður að teljast ansi líklegt að Úlfarnir verði ekki þar þegar að sumarglugganum kemur, enda svo gott sem fallnir á botni deildarinnar þó enn sé febrúar.

Robertson var sterklega orðaður við Tottenham í janúarglugganum, en Liverpool ákvað að lokum að halda í hann í nokkra mánuði til viðbótar.