Það virðist mikið ganga á í Kaplakrika en í vikunni var greint frá því að félagið vildi losna við Böðvar Böðvarsson, lykilmann hjá félaginu í mörg ár.

Böðvar hefur verið tjáð að hann geti fundið sér nýtt lið en Jóhannes Karl Guðjónsson nýr þjálfari liðsins virðist vilja breyta miklu.

FH setur stefnuna á að yngja upp lið sitt og virðist Jóhannes Karl ekki telja sig geta notað Böðvar í sumar sem hefur mikla reynslu úr efstu deild og atvinnumennsku.

Það virðist ekki bara innan vallar sem Jóhannes hefur skoðanir og reglur, því utan vallar er hann samkvæmt Þungavigtinni að breyta hlutunum. „Margir þjálfarar banna tómatsósu í matsalnum en hann bannar púðana,“ sagði Ríkharð Óskar Guðnason í þættinum.

Kristján Óli Sigurðsson segir að Jóhannes hafi bannað púðana. „Nikótínpúðar eru bannaðir í Krikanum, ég veit ekki hvort koffínpúðar séu bannaðir,“ sagði Kristján Óli.

„Það er mikilvægt fyrir FH að byrja mótið vel, þetta er alvöru pressa.“