Fjármáladeild Manchester United er þessa dagana að reikna út allt að 50 milljóna punda tap sem fylgir misheppnuðu tímabili.

Ótti margra stuðningsmanna á Old Trafford er sá að tapreksturinn muni enn á ný bitna á þeim sjálfum, með hærra miðaverði og auknum kostnaði.

Michael Carrick hefur nú tekið við sem bráðabirgðastjóri liðsins og bíður hans strax erfitt verkefni í borgarslagnum gegn Manchester City um helgina. Hann snýr aftur til félags þar sem fjárhagslegar kröfur og þrýstingur aukast með hverjum deginum.

Tap gegn Brighton í FA-bikarnum um síðustu helgi þýðir að United mun aðeins leika 20 heimaleiki á tímabilinu, sem er fæsti fjöldi síðan eftir lok fyrri heimsstyrjaldar. Þetta jafngildir um 50 milljóna punda tekjutapi af miðasölu einni saman, samanborið við síðasta tímabil þegar liðið spilaði 30 leiki á Old Trafford, þar á meðal sjö í Evrópudeildinni.

Frá lokum Covid-faraldursins hafa heimaleikir verið lykilþáttur í sterkum tekjum félagsins. United hefur verið fastagestur í Evrópukeppnum, með allt að 33 heimaleiki á tímabili á undanförnum árum. Aðeins Tottenham kemst nálægt þeim hvað varðar miðatekjur í ensku deildinni.

Sir Jim Ratcliffe og Ineos munu því gera þá kröfu að Carrick nái skjótum árangri. Lágmarkið er sæti í Evrópukeppni á næsta tímabili, enda fylgir því annars 10 milljóna punda refsing frá treyjusamstarfsaðilanum Adidas ef Meistaradeildarsæti næst ekki.