Áhugaverð frétt hefur litið dagsins ljós í kjölfar eldfims blaðamannafundar Ruben Amorim eftir 1-1 jafntefli Manchester United gegn Leeds United.
Eftir leikinn gaf Amorim sterklega í skyn að hann væri ósáttur við hlutverk sitt innan félagsins. Hann lagði áherslu á að hann hefði verið ráðinn sem knattspyrnustjóri en ekki einungis þjálfari og gaf jafnframt í skyn hvenær dvöl hans á Old Trafford gæti lokið.
„Ég kom hingað til að vera knattspyrnustjóri Manchester United, ekki bara þjálfari. Ég veit að ég heiti ekki Antonio Conte, Thomas Tuchel eða Jose Mourinho, en ég er knattspyrnustjóri Manchester United.
Þetta verður svona næstu 18 mánuði, eða þar til stjórnin ákveður að breyta. Ég mun ekki segja af mér. Ég sinni mínu starfi þar til einhver annar kemur og tekur við.“
Nú skömmu síðar segir Talksport frá því að framtíð Amorim hjá United sé í óvissu. Spila stirð samskipti við menn á bak við tjöldin þar mikið inn í.
Í fréttinni kemur fram að gremja Amorims hafi náð hámarki eftir að stjórn félagsins hvatti hann til að vera sveigjanlegri í taktík.
Amorim telur jafnframt að loforð um að hann fengi að styrkja hópinn í janúarglugganum hafi verið svikin. Það stefnir í rólegan glugga hjá United.
