Íslenski landsliðsmaðurinn Mikael Anderson má fara frá danska félaginu AGF fyrir um 2 milljónir evra, eða um 287 milljónir íslenskra króna, vegna klásúlu í samningi hans.

Um þetta er fjallað í danska fótboltahlaðvarpinu Mediano, en Mikael skrifaði undir nýjan samning til 2028 fyrr á þessu ári og var klásúlan umrædda þá sett í hann.

Mikael átti gott tímabil í dönsku úrvalsdeildinni í vetur og var algjör lykilmaður í liði AGF, sem hafnaði í sjötta sæti eftir dapran lokasprett, en liðið var lengi vel í baráttu um Evrópusæti.

Það voru breytingar gerðar hjá AGF eftir tímabilið og er Jakob Poulsen tekinn við af Uwe Rösler. Samkvæmt danska miðlinum Bold má búast við að það hafi töluverðar breytingar í för með sér á leikmannahópnum.

Það er spurning hvort eitthvað félag freisti þess að virkja klásúluna í samningi Mikaels, sem á að baki 33 A-landsleiki, í glugganum í sumar. Hann hefur verið hjá félaginu í fimm ár og átt marga góða spretti með því.