Margir eru á því að Víkingar hafi verið heppnir með dómgæsluna í 3-2 sigri gegn KR í Bestu deildinni í fyrrakvöld.

Víkingur komst yfir í leiknum með marki af vítapunktinum eftir að Valdimar Þór Ingimundarson hafði farið auðveldlega niður í teig Vesturbæinga.

„Aðeins um þetta. Albert, þú öskraðir víti, víti, víti, strax og þetta gerðist. Þetta er aldrei vítaspyrna,“ sagði Guðmundur Benediktsson í Stúkunni á SÝN.

„Ég hef aldrei séð Árbæing henda sér svona niður. Auðvitað hélt ég bara að þetta væri víti en þetta er aldrei vítaspyrna. Ég er mikill talsmaður vítaspyrna en þetta er eins mikil dýfa og þær verða,“ sagði Árbæingurinn Albert Brynjar Ingason léttur.

Þeir komu svo inn á að Víkingar hefðu verið heppnir á ný skömmu síðar þegar Karl Friðleifur Gunnarsson varði boltann innan teigs, fékk dæmt á sig víti en slapp við rautt spjald, eins og mikið hefur verið fjallað um.

Þetta var einnig rætt í Stúkunni og má sjá klippuna, sem birtist á Vísi, hér að neðan.