Jose Mourinho hefur látið athyglisverð ummæli falla en hans menn í Fenerbahce spiluðu titlalaust tímabil nú í vetur.

Fenerbahce endaði í öðru sæti tyrknensku deildarinnar og mistókst einnig að vinna í Evrópu og í bikarkeppni.

Mourinho segir að ‘undarlegir hlutir’ séu að eiga sér stað’ í deildinni í Tyrklandi en margir þar í landi vilja meina að meistarar Galatasaray fái hjálp frá dómurum þar í landi.

,,Við höfnuðum í öðru sæti deildarinnar, það var ekki markmiðið. Við áttum gott tímabil þar til við töpuðum titlinum og það var erfitt að koma liðinu aftur af stað,“ sagði Mourinho.

,,Undarlegir hlutir áttu sér stað í deildinni og líka gegn Rangers. Ég get ekki útskýrt þetta, heilt yfir var þetta svekkjandi tímabil.“

,,Þegar nýr stjóri kemur inn þá fær fólk von á ný en á endanum tapaði það sama fólk trú og völlurinn var hálf tómur.“