Rúnar Kárason, fyrrverandi landsliðsmaður og einn besti leikmaður Íslandsmeistaraliðs Fram í handbolta, var gestur Helga Fannars og Hrafnkels Freys í nýjasta þætti af Íþróttavikunni.
Þó Óskar Hrafn Þorvaldsson hafi vakið lukku fyrir hvernig KR-liðið hans spilar í Bestu deild karla í sumar er liðið í 9. sæti, stigi fyrir ofan neðsta sæti.
Margir hafa lofsungið leikstíl Óskars en aðrir gagnrýnt hann þar sem varnarleikurinn hefur verið dapur. „Það góða við þetta er að Óskari er skítsama,“ sagði Hrafnkell í þættinum áður en Rúnar tók til máls.
„Það er sársaukafullt að skipta um kúrs. KR á að vera toppklúbbur í fótbolta á Íslandi. Það sem þeir hafa verið að gera síðustu tímabil hefur ekki verið nálægt því að vera nógu gott. Hann er bara kominn til að segja: Við ætlum að gera þetta öðruvísi. Það er svolítið sárt en vaxtaverkir í því eins og öðru.“
