Staða þriggja leikmanna Real Madrid gæti verið í óvissu vegna yfirvofandi komu Xabi Alonso til félagsins. Spænska blaðið AS fjallar um málið.

Alonso er að taka við sem stjóri Real af Carlo Ancelotti. Félagið hefur þegar sótt einn leikmann formlega, Dean Huijsen frá Bournmeouth, fyrir næstu leiktíð og þá er Trent Alexander-Arnold á leiðinni frá Liverpool.

Koma Huijsen þýðir að David Alaba, sem hefur mikið glímt við meiðsli, gæti þurft að horfa í kringum sig ef marka má AS.

Þá gæti Rodrygo orðið í aukahlutverki í kerfi Alonso og mun hann ræða stöðu sína við spænska stjórann.

Loks er talið að Ferland Mendy verði ekki fyrsti kostur Alonso í stöðu vinstri bakvarðar og þyrfti því sennilega að sætta sig við töluverða bekkjarsetu.

Real missti af öllum titlum á þessari leiktíð og kemur það ekki til greina á þeirri næstu.