Alexander Isak veltir framtíðinni lítið fyrir sér að sögn, þrátt fyrir miklar sögusagnir undanfarið.

Sænski framherjinn er að eiga ótrúlegt tímabil með Newcastle og raðar hann inn mörkum. Skoraði hann til að mynda um helgina í sigri á Liverpool í úrslitaleik enska deildabikrasins. Liðið var að vinna sinn fyrsta titil í 70 ár.

Isak hefur í kjölfar velgengni sinnar á vellinum verið orðaður við stærri lið, þar á meðal Arsenal og Liverpool. Newcastle hefur engan áhuga á að selja hann, allavega ekki nema fyrir rosalegar fjárhæðir.

„Það er ekki frá miklu að segja. Ég elska borgina og félagið og líður svo vel hérna. Ég er ekkert að hugsa um framtíðina,“ segir Isak, aðspurður um framtíðina.

„Ég vil standa mig hér. Við vorum að vinna bikar og mig langar að enda tímabilið vel og tryggja Meistaradeildarsæti,“ segir hann enn fremur.