Jamie Carragher bað stuðningsmenn Chelsea afsökunar þegar hann kynnti umdeilt lið tímabilsins hingað til í úrvalsdeildinni í þætti Sky Sports, Monday Night Football.
Carragher birti val sitt í kjölfar 1-0 sigurs Fulham á Nottingham Forest og vakti liðið strax mikla umræðu. Í markinu valdi hann óvænt Robin Roefs hjá Sunderland. Í vörninni voru Daniel Munoz og Marc Guehi frá Crystal Palace ásamt Arsenal-mönnunum Gabriel og Riccardo Calafiori.
Á miðjunni stillti Carragher upp Declan Rice, Granit Xhaka og Bruno Fernandes, en í fremstu víglínu voru Erling Braut Haaland, Antoine Semenyo og Morgan Rogers.
Mesta athygli vakti þó að Moises Caicedo væri ekki í liðinu, en margir telja hann einn besta varnarsinnaða miðjumann deildarinnar. Carragher viðurkenndi sjálfur að valið væri umdeilt.
„Declan Rice hefur örlítið forskot á Caicedo að mínu mati. Áhrif Xhaka hafa verið gríðarleg hjá Sunderland og hann varð að vera inni,“ sagði Carragher og hélt áfram. „Ég bið Chelsea-aðdáendur afsökunar, eins og ég geri oft, en ég fann einfaldlega ekki pláss fyrir Caicedo.“
Carragher nefndi einnig Haaland og Rice sem bestu leikmenn tímabilsins hingað til, með Morgan Rogers þar rétt á eftir. Stuðningsmenn voru þó ósáttir og margir gagnrýndu liðið harðlega á samfélagsmiðlum.
