Curtis Jones hefur stigið fram og útskýrt hvað Mohamed Salah sagði við samherja sína í Liverpool eftir umdeilt viðtal sitt í kjölfar 3-3 jafnteflis gegn Leeds.

Salah vakti mikla athygli þegar hann gagnrýndi bæði félagið og knattspyrnustjórann Arne Slot opinberlega og sagðist hafa verið hent undir rútuna eftir að hafa setið á bekknum þriðja leikinn í röð. Í kjölfarið var Egyptinn skilinn eftir utan hóps í Meistaradeildarleiknum gegn Inter, en sneri aftur í hópinn í 2-0 sigri á Brighton, sem gaf til kynna að málið hefði verið leyst innan veggja félagsins.

Jones staðfesti í viðtali við Sky Sports að Salah hafi beðist afsökunar á framkomu sinni gagnvart liðsfélögum sínum. „Mo er sinn eigin maður og segir það sem honum finnst. Hann bað okkur afsökunar og sagði: Ef ég hef haft áhrif á einhvern eða látið ykkur líða illa, þá biðst ég afsökunar. Það sýnir hvers konar maður hann er,“ sagði Jones.

Jones bætti við að engin biturð væri til staðar innan hópsins. „Hann var jákvæður, brosandi og nákvæmlega sami Mo og alltaf. Þetta snýst bara um sigurvilja.“

Salah fer nú á Afríkukeppni landsliða með Egyptalandi og spilar ekki aftur með Liverpool fyrr en um miðjan janúar.