Eiður Smári Guðjohnsen var gestur í Dr. Football hlaðvarpinu í dag þar sem rætt var um heilsu leikmanna og hvernig ferilinn fer með fótboltamenn.

Eiður átti magnaðan feril sem atvinnumaður og var það í 21 ár, hann hætti árið 2016 eftir Evrópumótið í knattspyrnu með íslenska landsliðinu.

Hjörvar Hafliðason stjórnandi Dr. Football var að ræða þessi mál og sagði að Eiður virtist í góðum málum með líkama sinn í dag eftir langan feril.

„Þú heldur það? Þú hefur ekki séð mig skokka, það er ástæða fyrir því,“ sagði Eiður Smári og hélt svo áfram.

„Mér er illt alls staðar. Ég get ekki farið út að hlaupa.“

Hann fór svo yfir helstu meiðslin sem hrjá sig. „Hægra hnéð á mér, ég er með brjóskskemmd, liðþófinn er eiginlega alveg farin, ég fékk beinmar í skvassi fyrir ári síðan sem er ennþá. Þetta er smá saman að verða búið.“