Heimir Hallgrímsson náði á ótrúlegan máta að koma írska karlalandsliðinu í umspil um sæti á HM á dögunum. Ræða hans úr klefa liðsins hefur nú verið birt á vef knattspyrnusambandsins.

Írska liðið var í brekku fyrir landsleikjagluggann á dögunum, þurfti að vinna Portúgal á heimavelli og Ungverja úti. En viti menn, það hafðist.

Það var útlit fyrir að Írar myndu rétt missa af umspilssæti þar sem staðan var 2-2 í Ungverjalandi í uppbótartíma, en á lokaandartökum leiksins skoraði Troy Parrott sigurmarkið og fullkomnaði þrennuna.

„Þið eruð búnir að búa til umhverfi þar sem þið fáið alltaf tækifæri til að taka næsta skref. Það verður alltaf stærra og stærra próf fyrir framan ykkur,“ segir Heimir til að mynda í ræðunni, sem veldur sennilega gæsahúð hjá mörgum.

„Það eru allir svo hátt uppi í þjóðinni, en ímyndið ykkur möguleikana sem þetta hefur opnað fyrir ykkur. Allir vilja vera vinir ykkar núna, en einbeitið okkur að þeim sem hafa verið með ykkur á þessu ferðalagi.“

Á fjórða hundrað manns hafa sett athugasemd undir færsluna þar sem ræðan er birt. Fólk keppist við að hrósa Heimi. Skjótt skipast veður í lofti, en margir voru pirraðir á genginu undir stjórn Heimis fyrir nokkrum dögum.