Írland vann frækinn 2-0 sigur á Portúgal í undankeppni EM í kvöld, en Heimir Hallgrímsson er þjálfari liðsins. Cristiano Ronaldo var rekinn af velli og virtist kenna Heimi um það. Heimir var spurður út í þetta eftir leik.

Bæði mörk Íra komu í fyrri hálfleik en eftir klukkutíma leik fékk Ronaldo sitt fyrsta rauða spjald í sögunni með Portúgal. Ronaldo fékk rauða spjaldið fyrir að slá til leikmanns Írlands.

Meira
Ronaldo reiður Heimi Hallgrímssyni í kvöld: Fékk rautt spjald fyrir að slá til manns – Labbaði svo að Heimi og skammaði hann

Fyrir leik hafði Ronaldo svarað Heimi en eftir fyrri leik liðanna sagði Heimir að Ronaldo hefði stjórnað dómaranum í fyrri leik liðanna. „Ég tel að hann sé með þessu bara að reyna að hafa áhrif á dómarann í leiknum á morgun. Án efa. Hann er sniðugur maður,“ sagði Ron­aldo fyrir leikinn.

„Hann sagði við mig á leiðinni út af að þetta hafi verið sniðugt af mér,“ sagði Heimir eftir leik um uppþot Ronaldo í kvöld.

„Þetta hafði samt ekkert með mig að gera, nema ég hafi komist inn í hausinn á honum. Gjörðir hans á vellinum urðu til þess að hann fékk rautt spjald,“ sagði hann enn fremur.