Arnar Gunnlaugsson, landsliðsþjálfari Íslands segir hópinn gera kröfu á sigur gegn Úkraínu á morgun í undankeppni HM. Allt geti hins vegar gerst.

Ísland er með þrjú stig eftir tvær umferðir en gestirnir eru með eitt stig eftir jafntefli við Aserbaídsjan, lið sem Ísland slátraði á heimavelli. Leikurinn á morgun fer fram á Laugardalsvelli og er uppselt.

„Þeir eru með mjög marga góða leikmenn, eru með varnarmenn sem fór til PSG sem kostar meira en allt liðið okkar. Við þurfum að virða þá til að eiga séns á morgun,“ sagði Arnar á fundi í dag.

Serhiy Rebrov er þjálfari liðsins en hann átti farsælan feril sem leikmaður. „Það má líka bæta við að þjálfarinn er Rebrov, hann er mjög flottur. Ég er svo gamall að ég man eftir honum og Shevchenko frammi hjá þeim.“

„Ég dáðist alltaf að Rebrov sem leikmanni, hann hefur gert vel með þetta lið. Þeir eru töluvert fyrir ofan okkur á heimslistanum.“

Arnar vonast til að íslenska liðið geti nýtt sér það að Úkraína er með bakið upp við vegg. „Vonandi náum við að nýta það að þeir eru ekki alveg með kassann úti eins og okkar leikmenn eftir úrslit í síðustu leikjum.“

„Þetta er klárlega ekki byrjunin sem þeir gerðu ráð fyrir, þegar þú missir stig þá þarftu að vinna þei upp. Kannski ætluðu þeir að vinna Aserbaídsjan, gera jafntefli hérna og vinna okkur á eigin heimavelli. Þegar þú færð slæm úrslit þá hefur það áhrif, þetta er topplið. Það er krafan sem við gerum á okkur sjálfa að vinna leikinn, við megum ekki vera silly og heimskir í okkar nálgun. Við erum að keppa við toppleikmenn.“