Guðjón Pétur Lýðsson er að leggja skóna á hilluna eftir meira en 500 leiki á Íslandi, tvo Íslandsmeistaratitla, bikarmeistaratitil og fleira til. Guðjón fór yfir sviðið með Helga Fannari Sigurðssyni í Íþróttavikunni hér á 433.is.
Guðjón lék um tvö skeið á ferlinum með Val og náði frábærum árangri með Hlíðarendafélaginu frá 2016 til 2018, varð Íslandsmeistari í tvígang og bikarmeistari einu sinni. Í upphafi tímabilsins 2018 var miðjumaðurinn þó nálægt því að fara.
Ólafur Jóhannesson þjálfari hafði þá tilkynnt Guðjóni að hann yrði ekki í eins stóru hlutverki og áður. Vildi leikmaðurinn þá fara annað, þar sem hann fengi að spila. Fjallað var um ágreining þeirra á milli á þessum tíma en Guðjón segir samskiptin hafa verið á heilbrigðum nótum.
„Kristinn Freyr kemur heim úr atvinnumennsku. Hann tilkynnir mér að ég verði ekki endilega byrjunarliðsmaður. Hann var heiðarlegur við mig og ég kunni að meta það. Ég ákvað að melta þetta aðeins en svo sagðist ég bara vera á þeim stað á ferlinum að ég vildi vera lykilmaður, spila, leggja upp mörk og skora.
Það var settur verðmiði á mig og KR endaði á að vera það lið sem var til í að borga. En það var hætt við það hálftíma fyrir gluggalok. Valsararnir stoppuðu það. Ég sé ekki eftir því, við unnum deildina og ég spilaði fullt,“ sagði Guðjón í þættinum.
Hann var þó ekki par sáttur við að komið hafi verið í veg fyrir skiptin á þeim tíma.
„Ólafur sagði að það væru ákveðnir menn í Val sem hefðu ekki getað séð mig í KR, þetta yrði stoppað. Ég var mjög pirraður þá en svo fór ég heim til hans og við spjölluðum. Þetta var klárað og áfram gakk.“
Ólafur tjáði sig sjálfur um málið við Morgunblaðið á sínum tíma. „Við Guðjón Pétur urðum ósammála og það varð ágreiningur á milli okkar en ég hafði svo samband við hann í gærkvöld og sagði honum að hann færi ekki neitt. Ég boðaði hann á minn fund og við ræddum saman í morgun. Við erum búnir að leysa málin og hann mætir á æfingu í dag eins ekkert hafi í skorist,“ sagði hann.
Þátturinn í heild er í spilaranum, sem og á helstu hlaðvarpsveitum.
