Paul Pogba ætti að forðast endurkomu til Manchester United en hann hefur af þónokkrum miðlum verið orðaður við enska félagið undanfarna mánuði.

Hversu áreiðanlegar þær heimildir eru er óljóst en Pogba var hjá United sem táningur og sneri svo aftur til liðsins 2016 áður en hann hélt til Juventus.

Frakkinn hefur ekki spilað í um tvö ár eftir að hafa fallið á lyfjaprófi og er í dag án félags og leitar að nýju félagi.

Emmanuel Petit, fyrrum landsliðsmaður Frakka og landi Pogba, hvetur miðjumanninn til að forðast United en liðið upplifði afskaplega slæmt tímabil í vetur.

,,Manchester United er ekki það umhverfi sem Paul Pogba þarf í dag í sinni endurkomu – hann er að snúa aftur frá helvíti,“ sagði Petit.

,,Hann er að reyna að koma nafni sínu aftur á framfæri sem og ferlinum svo rétt umhverfi er mjög mikilvægt.“

,,Hann þarf að hugsa sig verulega um þegar kemur að þessu vali en líkur eru á að hann sé ekki með það mörg tilboð á borðinu.“