Damir Muminovic rifjaði upp skemmtilega sögu af einvígi Breiðabliks við FC Kaupmannahöfn í undankeppni Meistaradeildarinnar í Dr. Football.

Damir gekk á dögunum í raðir Blika á ný eftir dvöl í Brúnei í vetur en árið 2023 var hann hluti af liðinu sem tryggði sér sæti í riðlakeppni Sambandsdeildarinnar, fyrst íslenskra liða.

Á leið sinni þangað tapaði Breiðablik gegn FCK í undankeppni Meistaradeildarinnar, 0-2 heima og 6-3 ytra. Damir man vel eftir baráttunni við Orra Stein Óskarsson, sem í dag er fyrirliði íslenska landsliðsins og á mála hjá Real Sociedad, í þeim leik.

„Orri var 19 ára þegar ég spilaði á móti honum og hann gjörsamlega pakkaði mér saman á Parken, sama hvað maður reyndi,“ sagði Damir í Dr. Football.

Orri gerði þrennu í leiknum, en Óskar Hrafn Þorvaldsson faðir hans var auðvitað þjálfari Blika á þessum tíma.

„Hann laug líka að Óskari fyrir leik að hann væri ekki að byrja. Óskar spurði hann daginn áður en svo rétt fyrir leik var hann í starting,“ sagði Damir og hló.

FCK fór alla leið í 16-liða úrslit Meistaradeildarinnar síðar á þessari sömu leiktíð og vann til að mynda Manchester United á leið sinni þangað.