Viktor Gyokores hefur tjáð sig um eigin framtíð en hann er orðaður við nánast öll stórlið í Evrópu þessa stundina.

Al-Hilal í Sádi Arabíu er einnig orðað við framherjann en hann ku ekki hafa áhuga á að færa sig þangað.

Um er að ræða sóknarmann Sporting Lisbon sem verður ekki leikmaður liðsins næsta vetur og mun líklega leika á Spáni eða á Englandi.

Talað hefur verið um að samband Gyokores við Sporting sé ónýtt og að forseti félagsins hafi ekki virt heiðursmanna samkomulag um að Svíinn mætti fara fyrir 70 milljónir evra í sumar.

Gyokores hefur nú tjáð sig um allt það fíaskó sem er í gangi og sendi frá sér stutt skilaboð á Instagram.

,,Það er mikið talað um mig þessa stundina og þetta eru mest megnis lygar. Ég mun tjá mig almennilega á réttum tímapunkti,“ sagði Gyokores.

Framherjinn er 27 ára gamall og skoraði 54 mörk og lagði upp önnur 13 í 52 leikjum á tímabilinu.