Kyle Walker, leikmaður enska landsliðsins, segir að það sé til sérstakur hópur á WhatsApp þar sem núverandi og fyrrum leikmenn enska hópsins eru enn hluti af.

Walker er 35 ára gamall og er enn hluti af enska landsliðinu en hann er á mála hjá Manchester City en lék með AC Milan á láni í vetur.

Walker segir að það séu margir leikmenn sem þurfi að ‘mute-a’ hópinn umtalaða og sérstaklega ef þeir eru ekki valdir í verkefnið sem er framundan.

,,Við erum með WhatsApp hóp í enska landsliðinu en vanalega þá fáum við einkaskilaboð þar sem þér er tjáð að þú sért í liðinu,“ sagði Walker.

,,Seinna þá sérðu nöfn bætast í þennan hóp sem hafa ekki verið þar áður og koll af kolli.“

,,Þótt þú sért ekki valinn þá færðu að vera hluti af hópnum en þú þarft eiginlega að loka á allar tilkynningar því þér líður auðvitað nokkuð illa.“