Hreint ótrúlegt atvik átti sér stað á dögunum er Finnland var að velja landsliðshóp sinn í síðasta verkefni sínu fyrir EM í sumar.

Kona að nafni Stina Ruuskanen var valinn í leikmannahóp Finnlands í leik gegn Serbíu í Þjóðadeildinni.

Stina er fyrrum landsliðskona Finnlands en hún er 51 árs gömul í dag og spilaði sinn síðasta landsleik fyrir 29 árum.

Finnland ætlaði sér að skrá Nanne Ruuskanen í hópinn en gerðu þar mistök en hún spilar í dag með Djurgarden í Svíþjóð.

Outi Saarinen, landsliðsþjálfari Finna, hefur beðist afsökunar en liðið hefði þurft á Nanne að halda í leik sem lauk með 1-1 jafntefli.

Það er engin tenging á milli Stina og Nanne fyrir utan það að þær deila sama eftirnafni sem er ástæða misskilningsins.

Stina grínaðist sjálf með stöðuna og segist alltaf vera klár ef kallið kemur.

,,Það er magnað að vera kölluð inn í landsliðið á þessum aldri. Ég er alltaf klár þegar kallið kemur,“ sagði Stina á léttu nótunum.

,,Ég var nýlega að spila í bumbubolta svo ég er með hlutina á hreinu!“

Þetta var svekkjandi fyrir Nanne sem hefði líklega spilað sinn fyrsta landsleik en hún er 23 ára gömul og spilar sem hafsent.