Arnar ræddi við 433.is fyrir helgi og var þar spurður út í dráttinn í undanúrslitum Mjólkurbikarsins, þar sem Valur dróst á útivelli gegn KA. Arnar var þjálfari Akureyringa en yfirgaf liðið fyrir tveimur árum.
„Ég hefði auðvitað viljað fá heimaleik en lendi á mínum gömlu liðsfélögum. Það er bara gaman og verðugt verkefni,“ sagði Arnar, léttur í bragði, um bikardráttinn.
Hann benti svo á gott gengi KA í bikarnum undanfarin ár, meðal annars undir hans stjórn árið 2022.
„Þeir eru búnir að vera flottir. Við (þá KA) förum í undanúrslit fyrir tveimur árum og mér fannst við detta ósanngjarnt út á móti FH. Svo fara þeir í úrslit í fyrra og eru komnir aftur núna. Það sýnir að það er komin ákveðin hefði þarna.“
KA hefur hins vegar gengið afar illa í deildinni það sem af er tímabili. Liðið er í fallsæti með 5 stig eftir níu umferðir.
„Þeir eru með flott lið og ég vil meina að þeir eigi að vera með fleiri stig í deildinni, þó svo þeir hafi ekki alltaf verið að spila vel. Þeir eru samt með miklu betra lið en taflan segir.“
