Wesley Fofana, franskur leikmaður Chelsea, er löngu búinn að fyrirgefa miðjumanninum Enzo Fernandez sem spilar einnig með félaginu.

Fofana segir sjálfur frá en Enzo komst í vandræði á dögunum eftir að myndband af leikmönnum Argentínu var birt á samskiptamiðla.

Um var að ræða rasískt myndband þar sem gert var grín að uppruna franskra leikmanna en Fofana tilheyrir þeim hópi.

Þeir tveir hafa rætt málin í einrúmi og er varnarmaðurinn ekki sár út í Enzo sem segist sjálfur ekki hafa áttað sig á hvað hann væri að syngja.

,,Enzo er mættur aftur og ég er ánægður með það,“ sagði Fofana í samtali við blaðamann.

,,Við höfum rætt saman og ég útskýrði af hverju mér mislíkaði myndbandið, hann útskýrði sitt mál og baðst afsökunar. Hann vildi ekki særa franska aðdáendur eða neinn annan.“

,,Hann gerði sér ekki grein fyrir því hvað hann væri að syngja.“