Vestri hafnaði í fjórða sæti Lengjudeildarinnar á hefðbundnu tímabili og mætti Fjölni í undanúrslitum umspilsins um sæti í Bestu deildinni. Þar fór liðið með 2-1 sigur af hólmi samanlagt.
„Ég er virkilega ánægður með spilamennskuna í liðinu. Við vorum pínu ósáttir eftir fyrra einvígið, leikinn hérna heima. Við hefðum átt að fara aðeins betur í þann leik og ná inn fleiri mörkum. En heilt yfir er maður mjög sáttur,“ segir Davíð í hlaðvarpi Lengjudeildarinnar hér á 433.is.
Það tók sinn tíma fyrir Vestra að komast í gang á þessu tímabili en svo fórum vélin heldur betur að rúlla og endaði liðið deildarkeppnina á miklu skriði.
„Við spiluðum töluvert færri æfingaleiki en öll önnur lið í deildinni og vorum að slípa okkur saman. Samt leið manni aldrei eins og við værum slakara liðið í leikjunum sem við spiluðum í byrjun móts. Við vorum ekki nógu beittir á síðasta þriðjungi og vorum að leka inn mörkum úr föstum leikatriðum. Vorum pínu ryðgaðir í byrjun,“ segir Davíð.
„Auðveldasta leiðin til að búa til góða liðsheild er að ná inn sigrum og það er það sem byrjar að tikka með okkur og þá fer boltinn að rúlla. Það kemur trú í liðið. Við erum auðvitað með gríðarlega sterkan heimavöll sem fleytir okkur langt í sumar. Þegar líða tók á vorum við orðnir sterkir.“
Davíð segir að íbúar á Vestfjörðum flykkist á bak við Vestra fyrir komandi úrslitaleik, enda vilja allir sjá sitt lið í efstu deild í fyrsta sinn.
„Það er komin ofboðsleg samstaða, ekki bara í liðið heldur hérna á Vestfirðina. Maður finnur ofboðslegan kraft allt sem maður fer. Ég var nú bara að sækja lykla í grunnskólann í morgun og það byrjaði heill bekkur að syngja nafnið manns. Það er rosa kraftur hérna.“
Hlaðvarpið í heild er hér að neðan og má nálgast það á helstu hlaðvarpsveitum einnig.