Lögmaðurinn sem leiðir rannsóknina á Manchester City er harður stuðningsmaður Arsenal. Þetta kemur fram í grein Daily Star.

Enska úrvalsdeildin hefur ákært Manchester City í yfir 100 liðum og sakar félagið um að brjóta reglur um fjármál félaga.

Rannsókn hefur staðið yfir í fjögur ár en ákærurnar voru birtar í dag. Í yfirlýsingu segir að meint brot hafi átt sér stað frá 2009 til ársins 2018.

„Félagið er grunað um að hafa ekki skilað af sér réttum upplýsingum þegar kemur að tekjum, tengdum aðilum og kostnaði,“ segir í yfirlýsingu deildarinnar.

Á þessum tíma varð City meðal annars enskur meistari í þrígang. Möguleiki er á því að félaginu verði refsað með því að stig verði tekin af því.

Lögmaðurinn, Murray Rosen KC, fer fyrir hinni óháðu nefnd sem rannsakað hefur málið en hann er ástríðufllur stuðningsmaður Arsenal.

Arsenal er á toppi ensku úrvalsdeildarinnar með fimm stiga forskot á Manchester City.

„Mögulegar refsingar ef félagið verður dæmt fyrir þessi brot, eru háar sektir, félagaskiptabann, takmörkuð eyðsla, stig tekin af þeim eða titlar teknir af þeim. City mun enn á ný fá sér færa lögfræðinga,“ segir Nick Harris blaðamaður sem hefur fylgst náið með máli City.

City er sakað um að hafa farið frjálslega með sannleikann þegar kemur að styrkarsamningum og samningum við leikmenn.

Árið 2020 dæmdi UEFA enska félagið í bann frá Meistaradeildinni fyrir brot á sömu reglum, þeim dómi var áfrýjað og látinn niður falla.

Enski boltinn á 433 er í boði