Jadon Sancho sneri aftur á knattspyrnuvöllinn í gær í fyrsta sinn síðan í október. Hann hefur verið að glíma við meiðsli.

Kappinn kom inn á sem varamaður fyrir Manchester United eftir rúman klukkutíma leik í 2-0 sigri liðsins á Nottingham Forest.

Þetta var seinni leikur liðanna í undanúrslitum enska deildabikarsins. United vann fyrri leikinn 0-3 og er því komið í úrsltitaleikinn. Þar verður Newcastle andstæðingurinn.

Erik ten Hag stjóri United talaði vel um Sancho að leik loknum. Hann talaði um að hann gæti einnig fengið nýtt hlutverk og spilað í tíunni, fyrir aftan framherja.

„Við höfum gert þetta áður. Við getum fært Bruno utar og skapað nýja dýnamýk,“ segir Ten Hag.

„Jadon getur spilað sem tía líka. Hann getur spilað á kanti. Oft þá blöndum við þessu saman.“