Nokkur ólga ríkir í hópi stuðningsmanna KR þegar karlalið félagsins er þjálfaralaust og ekki virðist ganga neitt sérstaklega vel að finna rétta aðilann.

Stjórn KR tók þá ákvörðun að endurnýja ekki samning Rúnars Kristinssonar og hefur síðan leitað að eftirmanni hans.

Ólafur Ingi Skúlason hafnaði starfinu á mánudag en KR hafði einnig áhuga á að ræða við Óskar Hrafn Þorvaldsson, Halldór Árnason og Jökul Elísabetarson.

Enginn af þeim var klár í að taka við. Björn Reynir Halldórsson setti inn könnun í Facebook hóp stuðningsmanna KR. Skömmu eftir að könnunin birtist var henni eytt.

Björn spurðist fyrir um þessa ákvörðun þeirra sem stjórna hópnum og Sigurður Helgason sem er reyndur knattspyrnuþjálfari tekur þar ábyrgð. „Þetta var könnun sem var algjört rugl. Því henti ég þessu út. Það gat hver sem er sett sinn óska þjálfara.
Að öðru leiti virði ég gagrýni á KR. Það hefur verið óskað eftir því að ég hleypi þessu inn aftur. Það mun ég gera ef þið fáið 1% meðlimi óska eftir því jafnframt því mun ég yfirgefa síðuna,“ segir Sigurður nokkuð brattur.

Mörgum þykir það miður að stuðningsmenn KR fái ekki að ræða þessi málefni í hópnum. „Hvaða ritskoðunarsteypa er þetta?,“ skrifar Jóhann Hlíðar Harðarson fréttamaður Stöð2 á Spáni.

KR vonast til að ráða þjálfara í þessari viku en Greg Ryder, Sigurður Ragnar Eyjólfsson og fleiri eru nú mátaðir við stólinn í Vesturbæ.