Helgi Fannar Sigurðsson skrifar frá Liechtenstein

Arnar Þór Viðarsson sat fyrir svörum á fréttamannafundi hér í Liechtenstein í gær. Ísland og Liechtenstein mætast í undankeppni Evrópumótsins 2024 í dag.

Íslenska liðið byrjaði undankeppnina hreint skelfilega, með 3-0 tapi gegn Bosníu-Hersegóvínu.

Hann segir að leikmenn hafi eðlilega verið sárir eftir tapið en að nú sé hugur þeirra kominn á leik dagsins.

„Það er ein regla sem ég styðst við. Hún er að þú mátt vera fúll í 24 klukkutíma eftir tap. Þú mátt líka vera mjög ánægður og hátt uppi í 24 klukkutíma eftir sigur,“ sagði Arnar á fundinum í gær.

Tapið var Arnari og leikmönnum hins vegar erfitt.

„Þetta var erfiður dagur. Ég held að það sé aðallega erfitt að ná sér andlega niður, hvort sem maður er þjálfari eða leikmaður. Leikurinn spilast í hausnum á manni hundrað sinnum. Hægt og rólega fær maður rétta mynd af því sem gerðist. Það er það sem dagurinn í gær var notaður til að greina.“