Manchester United veit ekkert um áætlanir Cristiano Ronaldo, leikmanns félagsins, í sumar. ESPN segir frá þessu.

Framtíð Ronaldo er í mikilli óvissu um þessar mundir. Ekki er ljóst hvort hann ferðist með liðinu í æfingaferð til Tælands og Ástralíu. Hann hefur verið orðaður við Chelsea og Barcelona. ESPN segir þá frá því að Napoli og Bayern Munchen hafi áhuga á leikmanninum einnig.

Man Utd olli vonbrigðum á síðustu leiktíð og mistókst að ná sæti í Meistaradeild Evrópu fyrir komandi leiktíð. Sjálfur átti Ronaldo þó gott tímabil. Manchester Evening News greindi frá því fyrr í dag að Ronaldo væri ósáttur með að þurfa að taka 25% launalækkun sem tók ósjálfrátt gildi þegar liðinu mistókst að ná sæti í Meistaradeildinni.

Ronaldo sneri aftur til Man Utd í fyrra, tólf árum eftir að hann yfirgaf félagið fyrir Real Madrid. Hann skrifaði undir tveggja ára samning og á því seinni árið eftir af honum.

Man Utd er sagt vilja losa leikmanninn til útlanda frekar en að missa hann til keppninauta, eins og til að mynda Chelsea.

Enski boltinn á 433 er í boði