Heimir Guðjónsson, þjálfari Vals, segir að umræðan sem skapaðist í kringum hann í landsleikjahléinu á dögunum hafi ekki haft mikil áhrif á hann en hann hafi þó verið meðvitaður um hana.
Valur hafði tapað fjórum leikjum í röð fyrir landsleikjahlé. Sæti Heimis var sagt heitt og nafni hans, Heimir Hallgrímsson, var orðaður við starfið.
„Auðvitað les ég fréttir og annað. Það er fullt af fréttum sem er hent fram sem eiga ekki við rök að styðjast. Þá verður þú bara að ákveða hvað þú vilt lesa og hverju þú vilt trúa,“ sagði Heimir við Fréttablaðið.
Nú hefur Valur hins vegar unnið tvo leiki í röð, gegn Breiðabliki og Leikni. Heimir er sáttur með karakerinn sem liðið hefur sýnt.
„Við vorum auðvitað óánægðir með leikina áður en landsleikjahléið byrjaði en við nýttum það vel, æfðum vel og vorum staðráðnir í að snúa þessu við. Nú eru komnir tveir sigurleikir og við erum ánægðir með það.“