Lars Lagerback var sérfræðingur í setti Viaplay í kringum landsleik Íslands og Ísrael í Þjóðadeildinni í gær.
Leiknum lauk 2-2 þar sem Jón Dagur Þorsteinsson og Þórir Jóhann Helgason skoruðu mörk Íslands.
Lars vann sig inn í hjörtu íslensku þjóðarinnar á árunum 2012 til 2016. Hann var þjálfari liðsins sem fór á sitt fyrsta stórmót, EM 2016.
Eftir leik í gær var Lars spurður hvort hann myndi taka við íslenska landsliðinu nú ef kallið kæmi. „Nei,“ svaraði Svíinn léttur.
Hann hélt áfram. „Þegar ég horfi á sjálfan mig í speglinum held ég að ég sé kominn yfir hæðina. Maður saknar þess auðvitað en samtímis átta ég mig á því að ég er ekki ungur lengur.“
„Það heillar að vera í kringum þetta og hjálpa á einhvern hátt en ég væri hissa ef ég tæki að mér annað starf í þjálfun.“