Didier Olle-Nicolle, knattspyrnustjóri kvennaliðs PSG í Frakklandi, hefur verið sendur í leyfi frá störfum vegna ásakana um óviðeigandi hegðun og athugasemdir í garð leikmanna liðsins.
Félagið segir að leikmenn hafi orðið fyrir einhverju, ef ásakanir reynast sannar, sem á ekki samleið með gildum félagsins á íþrótta- og mannúðargrundvelli.
Hinn 61 árs gamli Olle-Nicolle tók við stjórnvölunum hjá PSG í fyrrasumar. Liðið er í öðru sæti deildarinnar, fimm stigum á eftir Söru Björk Gunnarsdóttur og stöllum í Lyon þegar tvær umferðir eru eftir.
PSG vann franska bikarinn í síðustu viku og komst einnig í undanúrslit Meistaradeildarinnar þar sem það beið ósigur fyrir Lyon.
Samkvæmt yfirlýsingu frá félaginu verður Olle-Nicolle í tímabundnu leyfi frá störfum meðan rannsókn stendur yfir.
„PSG tekur þetta mál alvarlega og ætlar að leiða í ljós öll atvik og athugasemdir.“
