Íslenska kvennalandsliðið var til umræðu í þættinum Íþróttavikan með Benna Bó á Hringbraut í gærkvöldi.
Liðið fer á lokakeppni Evrópumótsins í sumar. Ísland er í erfiðum riðli með Frökkum, Belgum og Ítölum. Íslenska liðið þykir þó afar spennandi og því er töluverð bjartsýni fyrir mótinu hér heima.
„Þetta lítur býsna vel út. Sara byrjaði á bekknum í gær (í leiknum gegn Hvíta-Rússlandi á fimmutdag) og er að koma inn í þetta,“ sagði Hörður Snævar Jónsson, íþróttastjóri Torgs, í þættinum. Íslenska liðið vann það hvítrússneska 0-5 í undankeppni Heimsmeistaramótsins á næsta ári.
Ísland hefur leik þann 10. júlí gegn Belgum. Annar leikurinn er gegn Ítölum þann 14. júlí. Loks mætir Ísland Frökkum þann 18. júlí. „Ég er spenntur fyrir sumrinu,“ sagði Hörður að lokum.