Real Madrid tók á móti Paris Saint-Germain í seinni leik liðanna í 16-liða úrslitum Meistaradeildar Evrópu í kvöld. Fyrri leiknum í París lauk 1-0 fyrir heimamenn.

Real byrjaði leikinn af krafti og kom ofarlega á völlinn. PSG tók þó smátt og smátt yfir leikinn þegar leið á fyrri hálfleikinn og fékk betri færi.

Kylian Mbappe var stórhættulegur fyrir PSG í leiknum og hann kom boltanum í netið með góðu skoti eftir rúman hálftíma leik. Markið var hins vegar ekki dæmt gilt þar sem Nuno Mendes var rangstæður í aðdraganda marksins.

Mbappe skoraði hins vegar gott og gilt mark á 39. mínútu. Hann tók þá sprett upp völlinn á ógnarhraða og Neymar renndi boltanum í gegn. Frakkinn setti boltann svo í netið framhjá Thibaut Courtois.

Staðan í hálfleik var 0-1.

Eftir tæpar tíu mínútur í seinni hálfleik kom Mbappe knettinum enn á ný í markið eftir frábær tilþrif. Mark hans var hins vegar aftur dæmt af vegna rangstöðu.

Eftir um klukkutíma leik jöfnuðu hins vegar heimamenn í Real. Gianluigi Donnarumma gerði sig þá sekan um afar slæm mistök sem leiddi til þess að Karim Benzema skoraði. Einvígið orðið galopið að nýju.

Vinicius Jr. fékk dauðafæri til að koma heimamönnum yfir á 72. mínútu en skaut þá yfir. Nokkrum mínútum síðar skoraði Benzema hins vegar sitt annað mark og jafnaði fyrir Real. Markið skoraði hann eftir sendingu frá Luka Modric.

PSG rétt náði að taka miðju áður en heimamenn þutu aftur fram í sókn og skoruðu þriðja markið. Enn og aftur var Benzema á ferðinni. Ótrúleg dramatík á Santiago Barnabeu. Real Madrid komið yfir í einvíginu.

Það virtist vanta allan anda og karakter í lið PSG til að jafna einvígið að nýju. Real Madrid sigldi sigrinum heim og er komið í 8-liða úrslit.

Rólegt í Manchester
Manchester City tók á móti Sporting. Fyrri leikur liðann fór 0-5 fyrir Man City.

Leikur kvöldsins var rólegur og lauk honum með markalausu jafntefli.