Lionel Messi fékk afar umdeilda vítaspyrnu er Argentína og Pólland áttust við á Heimsmeistaramótinu í Katar í gær.

Argentíska liðið vann sannfærandi 2-0 sigur. Bæði lið eru þó komin í 16-liða úrslit.

Messi klikkaði hins vegar á víti í leiknum. Hann fékk spyrnuna eftir viðskipti við markvörð Pólverja, Wojciech Szczesny.

Szczesny varði hins vegar frábærlega frá Messi.

Þessi markvörður Juventus á Ítalíu sagði frá því eftir leik að hann hafi veðjað við Messi áður en vítaspyrnan var dæmd með hjálp myndbandsdómgæslu.

Hann veðjaði hundrað evrum á að Messi fengi ekki vítið, en tapaði svo.

„Ég ætla ekki að borga honum. Ég held að honum sé sama um hundrað evrur,“ sagði Szczesny afar léttur í bragði eftir leik.

Pólland á erfitt verkefni fyrir höndum í 16-liða úrslitum. Þar verður Frakkland andstæðingurinn á sunnudag.

Argentína mætir aftur á móti Ástralíu á laugardagskvöld.