Bruno Fernandes vandaði Alejandro Garnacho ekki kveðjurnar eftir 0-1 sigur Manchester United á Real Sociedad, þrátt fyrir að leikmaðurinn ungi hafi skorað sigurmark leiksins.

Sigurinn dugði United ekki til að hafna í efsta sæti riðilsins í Evrópudeildinni og þarf liðið því að fara í umspil um sæti í 16-liða úrslitum eftir áramót. Þangað fer Sociedad beint.

„Í upphafi tímabils var hann ekki upp á sitt besta. Í ferðinni okkar á undirbúningstímabilinu var hugarfar hans ekki eins og það hefði átt að vera og þess vegna hefur hann ekki fengið tækifæri fyrr en núna,“ sagði Fernandes eftir leik.

„Nú fær hann tækifæri því hann er að æfa betur. Hann er með breytt hugarfar og á tækifærin skilin.“

Sparkspekingurinn Chris Sutton var allt annað en sáttur með ummæli.

„Þetta var algjör óþarfi. Erik ten Hag vill að skilaboðin úr klefanum séu á þann veg að allir séu á sama báti,“ segir hann.

„Þessi ummæli komu mér mjög á óvart. Hann hefði getað orðað þetta öðruvísi. Garnacho var frábær í kvöld. Hann var sá eini sem ógnaði af viti fram á við fyrir Manchester United. Bruno er betri en þetta.“