Callum Wilson, framherji Newcastle, hefur sagt frá því hvaða leikmann hann langi mest að fá til liðs við félagið.

Newcastle er í dag ríkasta félag heims eftir að opinber fjárfestingasjóður Sádí-Arabíu keypti það í haust.

Félagið hefur í þessum félagaskiptaglugga keypt þá Chris Wood og Kieran Trippier. Búast má við því að fleiri leikmenn gangi til liðs við Newcastle fyrir janúarlok, enda er félagið í fallbaráttu.

,,Þar sem ég er framherji myndi mig mest langa til að fá leikmenn sem hjálpa mér að skora sem flest mörk. Það er einfalt. Leikmaður sem er á toppnum yfir flestar stoðsendingar í hverri viku, á hverri leiktíð, spilar í úrvalsdeildinni, eins og Kevin De Bruyne,“ sagði Wilson. De Bruyne hefur, eins og flestir vita, verið einn fremsti miðjumaður heims undanfarin ár. Hann leikur fyrir Englandsmeistara Manchester City.

Wilson hélt áfram. ,,Að hafa hann fyrir aftan sig væri draumur. Þú tekur hlaup og hann finnur þig. Sumar stoðsendingar sem hann hefur gefið á framherja sína eru ótrúlegar.“

,,Við náum í Kev og sjáum hvernig okkur gengur þá,“ sagði Wilson svo léttur. Það verður að teljast ólíklegt að Newcastle kræki í þennan magnaða Belga, í bili allavega.

Enski boltinn á 433 er í boði