Logi Tómasson er að eiga frábært tímabil með Víkingi Reykjavík og hefur hann tekið miklum framförum. Uppgangur vinstri bakvarðarins er til umræðu í sjónvarpsþætti 433.is, en fyrsti þáttur vetrarins birtist í gær. Arnar Gunnlaugsson, þjálfari Víkings, er gestur.

„Er þetta ekki bara þroski? Hann er búinn að vera geggjaður,“ segir Arnar, spurður út í framfarir hins 22 ára gamla Loga.

Hann hefur skorað fimm mörk í 21 leik í Bestu deildinni og lagt upp jafnmörg.

„Ég held þetta sé þroski. Hann breytir um lífsstíl og er með sömu raddirnar sem eru að nöldra í honum á hverjum einasta degi, ég, Kári (Árnason), Sölvi (Geir Ottesen).“

Logi er að eiga mun betra tímabil í ár en í fyrra.

„Þegar þú vaknar upp við þann vonda draum að þú sért að missa af lestinni. Það er óþægileg tilfinning, en þægilegt samt að hafa tíma til að snúa við blaðinu.“

Arnar hefur miklar mætur á Loga sem leikmanni.

„Það sem hann hefur, fyrir utan yndislegan vinstri fót, þá er hann taktískt að verða sterkari og sterkari, hann getur spilað fleiri stöður og erbbúinn að vera frábær fyrir okkur.“

Hér að neðan má sjá viðtalið við Arnar í heild. Sjónvarpsþáttur 433.is er á dagskrá alla mánudaga á Hringbraut og hér á vefnum.