Gary Neville, fyrrum leikmaður Manchester United og sparkspekingur á Sky Sports, kom Jurgen Klopp og Liverpool til varnar eftir 2-1 tap liðsins gegn United í ensku úrvalsdeildinni í gær.
Jadon Sancho kom United yfir á 16. mínútu leiksins eftir vandræðagang James Milner og Virgil van Dijk í vörn Liverpool. Staðan í hálfleik var 1-0.
Marcus Rashford tvöfaldaði forskot heimamanna á 53. mínútu. Útlitið orðið afar gott fyrir Rauðu djöflanna. Mohamed Salah minnkaði muninn fyrir Liverpool þegar um tíu mínútur lifðu venjulegs leiktíma. Nær komust gestirnir þó ekki.
Roy Keane var einnig með Neville í útsendingu Sky Sports. Hann sagði að Klopp ætti að hafa áhyggjur af stöðunni. Neville er hins vegar ekki á sama máli.
„Hversu oft fórum við hægt af stað, byrjuðum tímabilið illa? Við þurfum að gefa þeim smá séns. Þeir hafa átt ótrúleg ár og komust í úrslitaleik Meistaradeildar Evrópu á síðustu leiktíð. Ég myndi ekki hafa áhyggjur af Liverpool,“ segir Neville.
